عبدالحمید مومند
دا چې ته په هسې رازې د رقیب
ځکه وړمه زه ناسازې د رقیب
څه ښادي به کبوتر زما د زړه کا
چې کېوتی په لاس بازې د رقیب
ته به څه منې زما کوتاه خبرې
چې منې دور و درازې د رقیب
هېڅ دې فهم د نیازمنو په نیاز نشته
هسې خوښ په کبر و نازې د رقیب
ستا د مخ د هواجنو زار په ځان دی
چې دا هسې دلنوازې د رقیب
سپي هډوکي وړي له خوا نه و ډېران ته
ته ناحقه په اعزازې د رقیب
حقاني نه ګڼې ځکه زما مینه
چې غولیدلی په مجازې د رقیب
له حمیده سره ساز شه کږې مه کړه
که په سوز و په ګدازې د رقیب