فرید باراني
مزاحمت
پلار مې غوسه شو چې سبق توجه نه لرم
مور مې ستګکې راته وکړې چې« کتاب راواخله »
ما پلار ته وکتله
او د کتاب پاڼې مې خلاصې کړلې
خو له سبق نه مې له ورایه دومره کرکه راتله
لکه چې څوک مقدساتو ته ښکنځلې وکړي
ما د کتاب په پاڼو
ستا له خمارو سترګو پرته بل څه ونه لیدل
په هر پاڼه کې یې سترګې اړولې راته
د پلار له ډاره مې څو ځلې سترګې وشړلې
سترګې ونه خوځېدې
نور مې کتاب وتاړه
مور ته مې پټ په غوږ کې وویله :
« همسایه لور به سبا پوهه کړې
چې زما د درس مزاحمت ونه کړي »
۱۸/تله/۱۳۸۹- صفا راډیو، جلال اباد