فرید باراني
والعصر
ستا په خیالونو کې تېریږي
د زمان د ټیک او ټاک هره شېبه په منډه
د قران ټوله مانا
هغه سره زر چې خدای په خپله
پرې « والعصر » وویل
هره شېبه یې ستا د خیال په بې پایانو دښتو
لکه باران دانه دانه تویېږي
علت یې ټوله ناچاري ده
او زما بې خوده لېوني دستاورد
هغه شېبه ده چې تېریږي
حس کوی یې نشم
د تېرو تېرو زمانو یو بې وجوده کلېپ
په دواړو سترګو کې مې وڅرخېږي
لکه خراب او سولېدلی فلم
زما په سترګو کې خطونه وکړي
له اوښکو ډکې مې شي سترګې
د تصویر له تمرکزه ووځي
او زه تنها په دې تنها اطاق کې
پټ مې په زړه کې بس همدا تکراروم
«ستا په خیالونو کې تېرېږي
د زمان د ټیک او ټاک هر شېبه په منډه
د قرآن ټوله مانا
هغه سره زر چې خدای په خپله
پرې والعصر وویل»
۳ \ لیندۍ \ ۱۳۸۹ جلال اباد، صفا راډیو