امیر حمزہ شینواری
ځينې خبرې چې په زړه راولم
بيا يې نو ولې په خوله نه راولم
له زړه نه ستا د تصور قافله
ولې بيا زړه ته په لېمه راولم
يو څو خبرې داسې هم لرمه
چې يې په خوله، نه يې په زړه راولم
زړه خو مې ستا دی خو د زړه لپاره
د زړه خبرې ستا په خوله راولم
چې بې له تا نه پکې هيڅ نه راځي
وايه چې نور به په زړه څه راولم
ښه به وي دا چې ميلمانه د ارمان
څه اشنا ته او څه به زه راولم
نوې حجره د مينې جوړه شوله
اوس د دردونو مېلمانه راولم
جمع کوم په پخوانې يادونه
ورله جرګه زاړه زاړه راولم
حمزه رقيب ته د اشنا لپاره
په زړه به بد او نه به ښه راولم