صاحب شاه صابر
زړه خو چې تا په مخه واخیستمه
ټولې دنیا په مخه واخیستمه
زه په خپل ښار کې لکه ورک لیونی
داسې سودا په مخه واخیستمه
ځه د ارمان دعا قبوله شوله
غم په رښتیا په مخه واخیستمه
ما يي ایله دبڼو جنګ اولیدو
زه يي بیګا په مخه واخیستمه
نن د احساس ګریوان ته لاس اچوم
نن يې صفا په مخه واخیستمه
د اسمانونو زور ته ودریدمه
خو ستا ادا په مخه واخیستمه
خپلو خیالونو د نظره کړمه
خپلې ادا په مخه واخیستمه
د خورو زولفو لیونو خیالونو
څه وارخطا په مخه واخیستمه