څه محبت څه انتظار یې کوو

زړه چې د کار وه نو څه کار یې کوو

مینې د چا خبره نه منله

د خپل اختیار وه خپل اختیار یې کوو

د محبت خونه چې ورانه نه وه

هر سړی ښه وه څه روزګار یې کوو

ساده مئینو پټه څه پېژنده

که بغاوت وه خو په جار یې کوو

درد د پرهر ائینه وڅنډله

لکه سپرلی چې وي سینګار یې کاوه

څړیکې زما د زخم زړه ته کتل

زړه یې بې واره وه خو وار یې کوو

ستا د قامت قصه مې هېره نه ده

څه هنګامه وه څه ناتار یې کوو

په غږ او غوږ چې پابندي وه سره

یو څو مارغان وه چې چغار یې کوو

د هر یزید په لاس د هر بېعته

زما یاران وو چې انکار یې کوو

دا به صابر وه ښه زه پوهه شومه

چې خوب یې نه وه انتظار یې کوو