ستړي زبيرګي نه کوي، ستم نه کوي

اوس څوک د هيڅ خبرې غم نه کوي

زمکه هم هغه جنتي زمکه ده

چې ادم نشته، نو غنم نه کوي

د غندل غاړو جينکو د غمه

ورشو غمژنه ده، شړشم نه کوي

زړه هغه وايي چې څه نه وايي څوک

هغه کوي چې څه عالم نه کوي

له دوزخونو يرېدلي‌ خلق

پروا د ژوند د جهنم نه کوي

ډېرې خبرې د يارانو ښې دي

څه که يو څو کارونه سم نه کوي

د محبت دنيا بدله شوله

اوس څوک د درد علاج په دم نه کوي

زړونه بې خوږو شو غم نه پېژني

سترګې د کاڼو شولې، نم نه کوي

صابره! ستا مينه مې ومنله

غم ته غم وايي، خو ماتم نه کوي