صاحب شاه صابر
نه هغه رڼې سترګې نه باڼه وینو تیاره ده
بې زړه نه يو خو څه وکړو ، مونږ څه وينو تياره ده
بس اورو چې په ښار کې د اسونو بادشاهي ده
په سترګو نه اسونه نه سواره وینو تیاره ده
په دې کوڅو کې هسې غړېدلي سترګې ګرځو
د يار د بڼو سوري پکې نه وينو تياره ده
د ښکلو د مخونو په لیدو پسې ړانده شو
د ښکلو نظرونه څنګه ووینو تیاره ده
د ډېرې زمانې نه مو څه ولیده نه زده کړل
د ډېرې زمانې داسې څه نه وينو تياره ده
د هغه ځایه اخوا خو تيرې د لامکان دي
تر هغه ځایه هم څه رڼا نه وینو تیاره ده
ددې او د هغې تمیز به څنګ کوو صابره
په سترګو خو نه دا او نه هغه وینو تیاره ده