صاحب شاه صابر
چې زما د زړه او ذهن ترجمان دی
محمد زمونږ نبی اخر زمان دی
د جاهل او جهل دواړو سره وران دی
د عالم او علم دواړو قدردان دی
مسلمان خو زوروره مسلمان دی
په سختۍ کې په کافر هم مهربان دی
څو چې څوک د سړيتوب په لار روان دی
هم هغه يې امتی دی، مسلمان دی
د دنيا د مظلومانو ترجمان دی
د ظالم په خونه تندر د اسمان دی
د تيارو غرور يې خاورې کړو رڼا شوه
کلک يقين ، کلکه جذبه ده، پوخ ايمان دی
په کچکول کې يې رڼا د کائناتو
څنګ فقير دی چې بادشاه د کل جهان دی
د انسان د پاره سوله، امن غواړي
د دنيا د پاره امن دی، ايمان دی
هر جهاد يې شروع کړی د خپل ځانه
په هر جنګ کې مېړنی مرد ميدان دی
د فتنو د فسادونو سخت خلاف دی
سوچه امن، سوچه مينه ده، ايمان دی