صاحب شاه صابر
چا ته نظر چا ته لېمه ووایو
څه نه څه هر ښکلي ته ښه ووایو
سپرلي مې لا د زړه سودا زیاته کړه
نصیبه چا چا ته سپېره ووایو
هم انتظار، هم ملامته په ما
د جانان دې عادت ته څه ووایو
کوم ستوری ستا د جبین خال وګڼم
کوم ګل ته ستا د حیا سره ووایو
چې نه سپوږمۍ شته نه وږمه د چمن
جانان ته حال د چا په خوله ووایو
په سږني سپرلي کې خاورې مینه
په سږني سپرلي به څه ووایو
پرېږده چې زړه د رقيبانو وچوي
راځه چې یو بل ته د زړه ووایو