له یو بله خبر یو د یو بل په زړه پوهېږو

خو یو بل ته کتی نه شو له یو بله شرمېږو

په بل هنر په بله دعا خدای خبر که روغ شو

د مینې په اور سوي یو په مینه به رغېږو

رقیب سره به ګورو د رقیب خبره نه ده

په مینه کې د مینې له یارانو نه ویرېږو

دنیا راته ولاړه وي دنیا راته پسخېږي

چې ځه او هغه ناست یو سره خپلو کې ګڼېږو

زمونږ د بېلېدو نظاره هم د تماشو وي

ودرېږو، روانېږو، ځو ودرېږو، روانېږو

د سترګو دا یوه نېکي دې ډېره ده، لوګی شم

پناه راکړې چې کله له حالاتو نه پټېږو

صابر ته د توبې خبرې مه کوه ناصحه

په مینه کې پښتو کوو، که مرو که پاتې کېږو