صاحب شاه صابر
په چمن کې که ګلونه که ازغي مري
خو زما د کور ښاېست زما سپرلي مري
دا مې لویه بدبختي نه ده نو څه ده؟
په پردي جنګ کې زما د بڼ زمري مري
د دنیا روزګار په سوله په صلاح شي
کوم قامونه چې د جنګ په لوري ځي مري
د دنیا اولسه هله که رادو کړۍ
سړي یو بل سره نخښتي دي سړي مري
مونږ نه هغو خلکو بلې لمبې تاو کړې
چې پخپله په پوټي غوندې لوګي مري
د خوشال په ادیره به ماتم نه وي؟
سره بڅري د ایمل د انغري مري
د اسلام د سپېڅلتیا مبلغینو
په کابل کې درنه شته مسلماني مري