شرابي سترګې ګلابي رنګونه

ما لېونی کړي لېوني رنګونه

ستا د جبین رڼا ته وپسخېدل

د ښایستونو د سپرلي رنګونه

په جنتونو مین څه پېژني

ستا د کوڅې مازیګري رنګونه

د جانان سترګې د نظره مه شه

په هر پرهر مې دوړوي رنګونه

خدایه لمن یې ترېنه داغ وانه خلي

په رڼو سترګو کې راوړي رنګونه

زما زخمونه اماني دردونه

زما یادونه تمامي رنګونه

د خورو زلفو سیوری مه خوروه

د خوشبویو نه شي خالي رنګونه

زه ترېنه چېرې بې نشې نه شومه

زما ساقي ماله ساتي رنګونه

سترګې مې ووځه خو ونه وینمه

د خپل جانان په مخ پردي رنګونه