دردونه په سینو کې پرهرونه په سينو کې

ساتو د مينی لوی لوی ارمانونه په سینو کې

په تمه د سپرلي د رنګینو د بارانونو

ساتلي مو تنکي تنکي زخمونه په سينو کې

یرېږو د یارانو تنګ نظرو د خبرو

وراسته مو کړل د ښکلو تصويرونه په سينو کې

خوږو خوږو سندرو ته لېواله لېوني یو

ټوکېږي مو خواږه خواږه دردونه په سينو کې

زمونږ مخې ته څه د نفرتونو دېوالونه

بهېږي مو د مينې دریابونه په سينو کې

تر هغې به رواج د خاموشۍ ته خطره وي

تر کومې چې درزېږي زمونږ زړونه په سينو کې

دنیا پکې د حورو د غلمانو د شرابو

زمونږ لېونو زړونه جنتونه په سينو کې

د مينې د ګودر چپو وهلي یو صابره!

زمونږه هسې نه خېژي برېخونه په سينو کې