سینګار د زړه د پرهرونو کوو

نن سبا مینه د ګلونو کوو

په تودو څړیکو یې وینځلي ساتو

څومره پالنه د زخمونو کوو

کر د ګلونو ارمانونو کوو

سوال د سپرلي د بارانونو کوو

بویه چې دا ازغي ګلونه سپړي

بویه چې لوبې په رنګونو کوو

چې د خوبونو تعبیرونه غواړو

بیا خو به لوبې د سرونو کوو

څومره بې خوږو بې خوٙږو خلکو ته

کیسې د زړونو د دردونو کوو

یاران د تېرې زمانې یادوو

ارمان د ورانو محفلونو کوو

که د هر ښکلي قدمونه شمارو

خو وظیفه د یار د پلونو کوو

هر وخت به څه نوې کوو خبره

یوه خبره د کلونو کوو

په خورو زلفو کې مې وزنګوه

بیا به خبرې د دارونو کوو

د مینې سل مجبورۍ سل غمونه

انتظار هم په انګارونو کوو