بيا دې په تخليق ولې؟ د مينې اثر نه ښکاري

زه شوم نابينا، که مې په سترګو کې لمر نه ښکاري؟

نه شول لېوني، لکه مجنون د چا په مينه کې

تاج د محبت د مئينانو په سر نه ښکاري

درده جوړ له څه شي يې، چې رحم در کې نه وينم!

زه وير لېونى کړم، خو په تا يې اثر نه ښکاري

څوکه د قلم په لاس، اظهار د بغاوت کوم

څو که مې په لاس کې وسيله د ضرر نه ښکاري   

دا چې مې هنر ته هنر نه وايي، قصور د چا؟

دا نه شي کېدى، چې په اسمان کې دې لمر نه ښکاري

ولې مې داخل کې بيا د ذوق سترګې ړندې شولې

ولې بيا په ما باندې الهام مقرر نه ښکاري

بيا مې هم دښمن ته د خلوص غيږه پرانيستې ده

څو که يې زخمي کړم، خو په ذات کې مې شر نه ښکاري

بيا ولې تياره شوه، رانه ورک د نور څراغ شو که

دا مې په کعبه زړه کې عيانه دلبر نه ښکاري