هلال عیان
دا وختونه مې په ژوند کې بقا ګوري
که مې هيلې په پرهر کې رڼا ګوري
د خپل ذات په ننداره يمه راوتى
دېوالونه ولې خاندي چې ما ګوري
رانه ونه کړه پوښتنه د مات زړه چا
لېونتوب مې دا تمامه دنيا ګوري
ما په خپل ذات کې په خپله ځان وژلى
هر ارمان، راته په تلو کې په شا ګوري
ګناهونه د دنيا مې تمام وکړل
راته لاره کې، حيرانه دعا ګوري
لېونى زړه مې د مينې په لټون دى
خو په لار کې راته بله بلا ګوري
د جنت په حورو څه وکړم عيانه؟
چې جانان راته په مړو سترګو بيا ګوري