د ګل ځواني د ګلبدن ځولۍ کې نه ځایېږي

ستا د ښاېست سپرلی د فن ځوانۍ کې نه ځایېږي

ستا د هوښیارو لېونو سترګو د حسن ډیوې

د عقل و هوش د انجمن ځولۍ کې نه ځایېږي

مونږه خړوب کړه د زلمو زړونه په ګرمو وینو

اوس به ګلونه د ګلشن ځولۍ کې نه ځایېږي

زه امن غواړم، حسن غواړم خو په ټوله نړۍ

د زړه درزا مې د وطن ځولۍ کې نه ځایېږي

د حوصلې ساه په کیندو د صبر زړه پریوزي

نور انتظار ستا د مئېن ځولۍ کې نه ځایېږي

دژوند په سترګو کې د وخت د درد و غم بڅري

نوز د خوبونو د خوږلن ځولۍ کې نه ځایېږي

زمونږ د نن مظلومیت سبا ته وار نه کوي

د وخت د نن ظلم د نن ځولۍ کې نه ځایېږي