ستا د مخ هسې بې جذبه پرتو نه دی

چې جهان په سر و مال ورته دو نه دی

چې مې ستا د مخ پيسې دي په لاس ايښې

راوستلې مې د ګټې یو پو نه دی

ډېر ستایل شېخ و ملا د جنت ښکلي

چې مې ولیده مخی د ستا یو نه دی

چې يې څوک په خوب کې وویني و نه مري

یاره ستا د بېلتانه هسې بو نه دی

چې د وچو سترګو شرم مې پرې پټ شي

را پرې ایښی د ستا غم هومره نو نه دی

د غمزې په تېغ مې ترکو سپينې پرېکړې

اوس مې زړه و جنګ ته چوي د دو نه دی

ستا په سترګو د غفلت پردې پرتې دي

ګڼه یار په مخ نیولی پلو نه دی

چې په مینه کې غنم غوندې و نه چوي

پوچ په کار دا هسې زړه په یو جو نه دی

چې په سر، مال غړوي غاړه له یاره

خدای دې نه کا، حمید هسې خود رو نه دی