جدايي له یاره یو نفس ماتم دی

چې فرقت شي په کالونو خو ستم دی

د وصال په طمعه باد غوندې چلیږي

ګڼه لږ هجر له قرنه سره سم دي

بې وطنه تنها پروت یم په غربت کې

نن له ما سره همدم د صنم غم دی

د هېواد اشنا په سترګو لیده نشي

که په خوب راته حاضر شي ډېر کرم دی

طولاني امل مې ډېر که خبر نشوم

چې له یاره سره عمر تر ګل کم دی

هیڅ حاصل مې بې دریغه ځينې نشته

ګذشته چې یادوم سود یې الم دی

قاصدان له روه نه راځي مدت شه

سلام باد را رسوي منت یې تم دی

که بهشت له ښایسته مخ خالي وي

عاشقانو به یاد کله که قسم دی

زړه عجب راڅخه ګم شه نه یې مومم

بې ګمانه به هورې وي چې صنم دی

تل په یاد د کجو زلفو پښو ته ګورم

تور ځنځیر لکه زلفینې خم په خم دی

چې د روه خبرې کله قاصد راوړي

په دا قصد یې منت ایښی په ماتم دی

د روهي دارو په تا نشي طبیبه

د فرقت اس یې په زړه ایښی قدم دی