اشرف خان هجري
هجره څه خو فرصت را زړه مې پاره شه
سر یې لاندې ستا د جور تر اره شه
د یارانو جدايي مثال چاړه ده
د زړه سر مې پر قلم لکه تره شه
د وصال دولت به څوک سلامت یوسي
بېلتون سل زره لښکر پسې پره شه
راشه یو ځل خټک ګوره په دکن کې
چې له هجره ډېر ناڅيز لکه ذره شه
د یار یاد مې قامت هسې پېچ و تاب که
په دا کار مثال د زلفو په طره شه
د هجران خمار یې زر په سر کې کیني
چې شراب د وصال نوش کاندي غره شه
هر ساعت یې د ستم په داړو نیسي
د یار یاد لکه لېوه هجري بره شه