دروېش درانی
تر تا ښه نه وه خو په دې به تر تا ښه شوه سپوږمۍ
د لري لري نه به کله را ښکاره شوه سپوږمۍ
ستا د راتلو وعده لا نه ده پوره شوې اشنا
زر ځله نیمه شوه او زر ځله پوره شوه سپوږمۍ
مجنون سپوږمۍ ته ګوته ونیوه او ويې ویل
دا وه په ورځ د لېلا مخ او اوس په شپه شوه سپوږمۍ
دا ویل کېږي چې دوې خویندې له جنته راغلې
په هغه دوو کې یَوه ته يې او یَوه شوه سپوږمۍ
وم ستا د مخ په ننداره، زه دروېش نه خبرېدم
چې کله پرېووت زېړی لمر، کله ښکاره شوه سپوږمۍ