دروېش درانی
ښېرا کوي اثر خو خوږمن زړه به يې وي شا ته
په غشي که ويشته کوې لینده به يې وي شا ته
دېوال مو دی په وړاندې نړوويې خو پوه نه یو
غمي به وي، ماران به وي که څه به يې وي شا ته
یو کاڼی د ناحقو مې را پرېووت پر سر باندې
خبر نه یم چې لاس د کوم ړانده به يې وي شا ته
دوی ټول په دې خوشحاله دي چې لمر هغه دی راغی
خو زه په دې خفه یم چې تیاره به يې وي شا ته
د سپينو اوبو څاڅکې ته که خلک اوښکه وايي
دروېشه! نو یو زړه او دوه لېمه به يې وي شا ته