امیر حمزہ شینواری
څنګه شوې اشنا د نا اشنا په څېر
نن خو را ته ښکارې د بل چا په څېر
خود راته عقبی شوه د دنیا په څېر
رنګ مې چې دنيا کړه د عقبی په څېر
ګډ مې اسوېلۍ وې د خندا سره
رنګ مې د اخفا وې د افشا په څېر
نورې ډيوې اې د سبا لوزه ته
ستا دغه وينا ده د وينا په څېر
وايي چې ريباره چې يار هيڅ نه وې
څه ښکلي دروغ وو د رښتیا په څېر
اوس نوې صحرا شته، نه بازار نوی
نشته تماشا، د تماشا په څېر
ورک مې شو وحشت که غولۍ نشته دی
بیا راته خپل کور و د صحرا په څېر
عشقه د هر چا نه دې ممتاز کړمه
ښکارم چې هر چا ته، د هر چا په څېر
شېخه چې رندانو ته قهرېږې ته
خولې ته دې ځک راشي د صهبا په څېر
هر کله ريباره د لېمو دې جار
نن خورا ته ښکاري د حمزه په څېر