په فراقجنو که پرې باسې ته خندان تندر

سحره پرېوځه په تا مې د ګرېوان تندر

نن يې په مخ د طبيعت د تازګۍ نخښې وې

و په دې وخت يې تبسم د شين اسمان تندر

د اداګانو تندرونه دې زاړه شو اشنا

اوس که پرېباسې په ما پرېباسه يو ځوان تندر

غوسه دې لږه وه لا برق و د موسکا ور پسې

ساده مین څه پېژندو د امتحان تندر

بلبله بيا نو حيثيت د تا د جالې څه دی

چې هغه شوخ و غورځوي په ګلستان تندر

ته زما اوښکو ته موسېږې هيڅ خطر نه کوې

ښکليه خبر شه چې پيدا شي له باران تندر

حمزه په مخکې د رقيب کوه ستاينه د يار

چې کړي پاتې خواږه سېزل د غزل خوان تندر