چې اشنا مې له قفسه کړي صياد

پس له هغې به بيا ما کاندي آزاد

جفا نه ده، په دې خيال يې هېرومه

ګوندي داسې شم اشنا ته ور په ياد

د اشنا کوڅې ته باده چې را نه شې

څو چې نه کړم دغه خاورې په سر باد

ته قايل د پښتو نه يې زه پښتون يم

مينه چرته اجتماع کې د اضداد

هره پاڼه اوس د وخت لولم په ترهه

زمانې راباندې ډېر سبق کړو ياد

په شيرينه خوله اوس خلک نه تېروځي

خبردار په کم فهمۍ شول د فرهاد

جمعيت له هغه قامه څخه ووت

چې خودبين او پرېشان يې شول افراد

ده مې وينه د ملت، د اشنا نه ده

امانته سرمايه ده د جهاد

نن رندانو د زاهد لباس اغوستی

حمزه اوره چې به څه کاندي ارشاد