امیر حمزہ شینواری
چې زما نه دې رخصت په سحر وغوښت
ضبط او صبر اخرت د سفر وغوښت
ستا ديدن که په ژړا شوی يوسف مخيه
د يعقوب نه ورله ما به بصر وغوښت
خپل آيين دې د کرم هم پرېښوی نه شو
آيينه دې راکړه ما چې نظر وغوښت
ستا په سر چې مې خپل ياد درته غرض و
خفه مه شه که قيمت مې د سر وغوښت
خدای چې در کړل در له هسې باڼه غشي
ما ترې ځکه د فولادو ځيګر وغوښت
شوه معلومه چې ورک نه دي، لبول شوي
د خپل زړه نه چې د زړه مې خبر وغوښت
حمزه روح دې پهلوان و له ازله
چې د خدای نه دې الفت د حيدر وغوښت