امیر حمزہ شینواری
داسې زه د يار په عشق کې يم په دار مست
لکه ګل وي د چمن په نوبهار مست
ما چې شمار نه کړې په مسئوليونو کې
اې زاهده، يم خرمست، ولې هوښيار مست
د الستُ هغه نغمه مې لا تر غوږ ده
نو به څنګه شم په ميو د دې دار مست
چې تمکين زما بدل په تلون شو
لا تر اوسه ځکه دی زما قرار مست
د ازل نه ده مستي زما په برخه
نقصان څه دی که شم اوس د چنګ په تار مست
اې حمزه ښه هغه مست دی له رندانو
چې وي تل د يار د ميو په خمار مست