امیر حمزہ شینواری
چې الفت د حد نه تېر شي د حبيب
پاتې کېږي نه ادب او نه اديب
محبت د انتها نه هله تېر شي
چې نظر هم ورته خپل ښکاري رقيب
بُعد هله بُعد بويه چې قربت وي
چې دا نه وي نه بعيد شته نه قريب
دنالې او د بلبل نسبت خو ګل وي
ګنې چرته ژړا چرته عندليب
چې تپوس د زړه زخم يې مزګان کړي
دا زخمي دی په دنيا کې خوش نصیب
چې بيان د يار د خط او د خال نه کا
بې حاصله قيل و قال دی د خطيب
ستا علاج به حمزه بل طرف ونه شي
خو چې خدای دې بې نوا کاندي طبيب