امیر حمزہ شینواری
که را مخ زما په لور هغه صنم کا
بُتخانه به مې د زړه لکه حرم کا
ساقي زده له صراحي مې د زړه راز کړه
ورته ګوره چې عطا کوي سرخم کا
چې کږلېچ دي د هوس په وس کې نه وي
پاڅه مينې ته نعرې کړه چې يې سم کا
قام ته هغه دوه مخۍ توره پيدا کړئ
چې هم توره هم کارونه د قلم کا
عشقه ډېر به دې ژوندون شي مبارک شه
چې کاته په هر محفل کې راته کم کا
تل ګلان به د وفا ترې زرغونېږي
کومه خاوره چې مينې اوښکې نم کا
بل قدم به د اشنا په درشل کېدي
که مېن يې دوه جهانه یو قدم کا
حمزه مات به کړي سنګر د بېلتون هغه
چې لښکر د ارزوګانو منظم کا
ستا مېنو کې حمزه هم عجب شی دی
چې پوښتنه هم د تا نه ستا د چم کا