د هر چا په نصیب لیک دی نصیبونه

نن به نشي په زور برخه د چا نوره

که یقین له جهله نه کړي په دا قول

د باور په سترګو حال د دور ګوره

یو طلب د سویو کا په شهد پېښ شي

ثاني مړ شی روغ وتلی وي له کوره

بل کاسه د شربت ډکه ځان ته کیدي

په زمان یې قضا واړوي نسکوره

چې نصیب دې نیک و بد په ازل لیک شه

حسد ځکه له چا نه کا نیکان وروره

هر اشیا په مرتبه د اصل کار کا

خاصیت د اوبو مه غواړه له اوره

د نیسان قطره په نس د صدف دُر شي

همه زهر وي چې ورشي تر منګوره

نه به څوک ازلي کوږ په وعظ سم کا

نه به سپینه کا صابون شړۍ توره

زوی د پلار په رضا نه ځي بې غرضه

نه به لور په خیر وینې له موره

ما هجري باریک نظر په دنیا وکړ

هیڅ طرف یې خالي نه وینم له شوره