اشرف خان هجري
هر چې بد عمل ته شا نیکو ته مخ کا
وایه ښه بنده د رب دوست د نبي دی
داد همه د کردګار چې یې په چا کا
ولې هسې ګمان کړه چې بهشتي دی
چې په بد عمل ارزو د بهشت کاندي
تش دې باد پیمانه کاندي مدعي دی
د بهشت لیده محال ګڼه هغه ته
چې یې خوی د سړي نه رنګ د سړي دی
دا حدیث ځکه وارد په دا معنی شه
چې په زر کې بهشتي یو امتي دی
دا ژوندي په څه ښادي کا خبر نه یم
ښادي رخ د هغه چا چې مُنجي دی
هجري طمعه د نجات لري له خدایه
کبیره که هر څو ډېر لري عاصي دی