اشرف خان هجري
چې زلفینې په ښه مخ باندې مرغول کا
هر زیبا مرغول یې وژله لکه غول کا
هر چې مخ یې برهنه په چشمو ولید
په ژړا لکه مجنون خانه په چول کا
په چارګل یې ملک همه زیر و زبر که
لا به څه شی چې په غاړه همه پسول کا
هیڅ اثر یې په زړه نشي له نخوته
که شیدا په ناله تشه ناله قول کا
هغه کار چې یو نظر د جونو کاندي
هسې کار نه هر اول نه د ښه غول کا
شهی مه ږده په کټ پښه چرې به خوږ شې
څو ګلونه د بستر خادمه ټول کا
هر شیدا چې یې په دید د حسن ورشي
تش بدن یې رهیده خاطر یې اول کا
عشق یو څه سنګ محک دی په دنیا کې
هر چې شک د غش لري نما یې پول کا
د خورو څڼیو بها په جهان نشته
د دنیا په مال یې بیعه مګر ګول کا
هجري قدر د طرو تر هر څه ډېر دی
که عزت یې څوک د عشق په تله تول کا