اشرف خان هجري
په دنیا کې عجب څيز وايي هجران دی
چې سبب د وصال دی کړي یزدان دی
که کافر له مرګه ډار کا مناسب دی
ډار به ولې کا هغه چې مسلمان دی
که په مرګ یې له فاني داره روان کا
په بدل یې جنت ورکا تل بستان دی
دا فاني دولت ظاهر بقا یې نشته
که جنت راکړي مولا چې تل ودان دی
د ناپاکو ځای هر ګز په جنت نشته
په دا قول مې شاهد جمع فرقان دی
بهشت ځای د هغو پاکو دی بېشکه
چې په دین یې د نبي ثابت ایمان دی
ورځ او شپه د عمر هسې ګذر کاندي
لکه سیند چې قرار نه کاندي روان دی
ته طلب د دین کوه غم د نان مه کړه
په روزۍ هغه پوره چې دې ضمان دی
د باقي خونې زینت په ښه عمل کړه
وفا نه لري دنیا ځای د ارمان دی
هر نصفي بیت یې د دې غزل موزون کړ
په شل دوه حرفه د عقل په میزان دی
هجري مه شه نا امید که ګنهګار یې
البته به انعام وکا مهربان دی