اشرف خان هجري
هر بشر چې سور د عقل په سمند وي
په تودو سړو نه غم کا نه خورسند وي
هر ساعت د نیک و بد چې په چا ورشي
نه نیوه شي لکه باد نه په څه بند وي
د دنیا په چارو پوه کله باور کا
مګر کا هغه جاهل چې خودپسند وي
هیڅ باور په حیات نه توښه اخله
څوک خبر نه وي هرګز چې عمر چند وي
بېهوده طمعه نادان له سوده پس کا
دانا دل ته د همځولي موت پند وي
سیاه دل ته د ښو پند لکه ګنډیر شي
بختور ته د بهبود خبرې قند وي
هجري هر چې پیروي کا د نیکانو
په دوه داره به بېشکه ارجمند وي