اشرف خان هجري
که نصیب بنده بند کړی په دکن دی
دامن ګیر یې همېشه عشق د وطن دی
ښادي څه ته عالم وايي خبر نه یم
تل ژړا زما ریاض غم مې چمن دی
چې د عشق په توره مړ کفن یې نشته
کله روغ د پاک شهید نوی کفن دی
چې زما زړه یې بندي شه په کوهي کې
همېشه راته په یاد هغه ذقن دی
د رضا په لوري څه شکله یون وکړم
چې تر څټ مې چابيره د رزق رسن دی
ما به څه شکله طبیب د وصال روغ کا
د فرقت داغ مې د زړه په سر کهن دی
د زړه باز یې تل د روه په زمکه ګرځي
که هجري په دکن ناست خالي بدن دی