اشرف خان هجري
دواړه شونډې دې په خوند وینم حلوا دي
نه غلط شوم ستا په سر ګو چې اولا دي
دوه عارض دې مشابه وینم په سیبو
نه بېشکه دا دروغ ترې مصفا دي
دوه اهو د اهو کله هومره زیب کا
صد هزار ځله ترې ښکلې سترګې ستا دي
رنګ و بوی د مښکو ډېر کمی یې نشته
ولې ستا څڼو ته سهل تر ګیاه دي
سپین ګوهر د لمر په سر که هر څو زیب کا
در و لعل ستا مولا هغه لالا دی
دوو منګلو ته دې څه شکل نقره وایم
چې په څومره مرتبې سپین تر سپین والا دي
په کاغذو ښه خوشخط مدونه وینم
ترې دوه وروځې صد هزار ځله زیبا دي
د ټیکې موتي دې بل رنګه زینت کا
ښایسته که هر څو ستوري د سما دي
تر هر څه هجري خوږې ګڼي دلبرې
له ازله چې نازل په دا دنیا دي