په ظاهر د فلک رنګ ګوره زرغون دی

خو تاثیر یې د ګردش بوقلمون دی

هیڅ باور یې په قرار د چارو نشته

نوی مخ په دم پیدا کا دګرګون دی

دا دارا په وینو سره د شام اوره دی

د صباح شفق هم د سکندر خون دی

د کسرا تاج یې په زور له سره کوز کړ

پرې ایستلی یې له تخته فریدون دی

ته چې نن د وفا طمعه کړې له دهره

دا فکرونه دې باطل عقل زبون دی

په نهاد که یې تاثیر د وفا نشته

واړه تخم د جفا پکې معجون دی

د حرص تېغ دې ناحق په عاړه کېښو

پرې غوڅ کړی دې د صبر د آس ورون دی

نصیحت د ناصح کله پرې تاثیر کا

هغه زړه چې په هوا چارو مفتون دی

په کثرت د دنیا فکر هر ګز مه کړه

که مذکور دې اوریدلی د قارون دی

تر دنیا وګړي تېر نامه یې نشته

محبت نام زنده کړی د مجنون دی

هجري رخت د اقامت په جهان مه ږده

نن پیدا شوې په دنیا صبا دې یون دی