په اندوه یې ولایت همېش فتور وي

هغه زړه چې په اشنا پسې رنځور وي

خوب خندا به یې په څو کیږي یارانو

هغه کس چې په حیات له یاره دور وي

که له یاره هجر سخت وایم باور کړه

تل واته د روح له تنه په ضرور وي

شاید اوس یې هجر نوم کړو زمانیو

له ازله به یې نوم د اور تنور وي

که د عشق له غشي ژاړمه عیب مه کړه

تل زخمي اهو په دشتو کې تر هور وي

زه له یاره صبر څشکل کړم واعظه

قسمت لیک شه په ازل نن یې ظهور وي

د هغه یار له درباره صبر نه شي

چې د زلف حب یې د زړه په څټ سجور وي

چې د عشق په لار یې نه وي رفتار کړی

که اسان ګڼي دا کار هغه معذور وي

هجري تش صورت نصیب په دکن بند کړو

په خدمت یې د یار زړه دایم حضور وي