اشرف خان هجري
هغه دم چې یار له ما سره قریب وي
که باد راشي په مجلس لکه رقیب وي
هر عاشق چې غوڅ په تېغ د محبت شي
په دارو یې حاجت کله د طبیب وي
په رښتیني عاشق خوږ وي تر نباتو
هغه جور چې پرې کړی خپل حبیب وي
چې بازار په ریاض جوړ شي د ګلونو
د ښاخ سر لکه منبر بلبل خطیب وي
یو قدم هجران له یاره خرابي ده
زار په ځان دی د هغو چې دوه جریب وي
د ښه یار مجلس تر هر دولت بهتر دی
په دا کار هغه پوهیږي چې لبیب وي
هجري ته خو تل هوس د ولایت کړې
ولې ستا ورتله محال مګر نصیب وي