اشرف خان هجري
هر زنده چې په دا خونه د عذاب شته
نهایت یې تورو خاورو ته مآب شته
نیک و بد عمل چې کړې جزا یې حق ده
د یوه بدل عذاب د بل ثواب شته
دلیري په خیانت د فرمان مه کړه
په ادب معاش کوه ځای د حساب شته
په وسعت د جهان ځای د غرور نشته
چې په مخکې تنګه خونه د تراب شته
د راحت ملک به هرګز د چا خپل نشي
چې یې ضد لره د دهر انقلاب شته
د مراد د عنقا تن کله موندی شي
څو په سیر مخیر ویده شهاب شته
په بقا د حیات څه لره امید کړې
چې په تله د عمر دا همه شتاب شته
زه که حال د جهان وایم فضولي ده
نمونه یې خیمه ګواهه د حباب شته
په مراد به د وصال میوه و نه خوري
په دنیا چې د هجران ضد و عتاب شته
دا ویل به په دیوان د مرزا نه وي
که باور د دویو نه وي په خطاب شته
که انکار په زړه لرې سیر یې وکړه
که یې تیر شه مصنف هغه کتاب شته
دا غزل چې هجري ووې یقین وکړه
که یې نوم شاعر په دور د جواب شته