چې یې نه مخ له ازله په بهبود وه

د نبي دیدن هغه ته کله سود وه

تاثیر کله د نیکانو پند پرې وکړ

ابوجهل که فرعون او که نمرود وه

کاف و نون یې د قدرت په ژبه ووې

نور همه خلق یې امر ته موجود وه

لا هاله یې برخې وکښې په کتاب کې

چې نه اسم د ادم نه یې وجود وه

عنایت واړه د خدای چې یې په چا کا

له ازل د یو شقي صفي مسعود وه

د هر چا لارې یې بېلې هغه دم کړې

چې نه نوم د نصرا نه د جهود وه

که خواهش د قضا نه وي یقین وکړه

یو سړی به نه ترسا نه به یهود ونه

چې اولاد د یوه پلار که یې رضا وي

مسلمان به د ادم همه جنود وه

زه به څښکل د احمد مدحه بیان کړم

چې شرف ته یې ډېر لږ چرخ د  کبود وه

نوم یې ځکه محمد احمد محمود شه

چې منصب یې ازلي مقام محمود وه

چې هجري یې د احمد حلقه بګوش کړو

له ازله پرې ډېر مهر د معبود وه