اشرف خان هجري
په ټیکه کې د صنم جوړه هیرا وو
لا روشن تر ماه و مهر په ضیا وو
که هیره په دا خوبۍ وو او بېشکه
ولې مخ ته یې لا سهل تر ګیا وو
اننګي یې ما له سیبو مقابل کړل
هغه ټوکې د ململو دا خامتا وو
بیا یې لعل چا و لعلو ته نزدې کړه
د هغه قیمت خو شته دا بې بها وو
د غاښونو زیب یې ګډ په خجالت کړه
هغه دُر چې پاک راغلی له دریا وو
شاعرانو چې یې قد چنار نسبت کړو
سراسر یې دا ویل واړه خطا وو
هغه وچ لرګي مې ولیدل په باغ کې
مثال کله په بالا د مستې شا وو
نه یې زړونه صبر کا نه مراد مومي
عاشقان همه چې غم لره پیدا وو
د هجري د عشق نوبت دی نن له یاره
د اول دور نامي مجنون لیلا وو