اشرف خان هجري
یاره راشه له عالمه تن کنار کړو
په خلوت کې سره ناست بوسه کنار کړو
په افراط جامونه واخلو د شرابو
تورې خاورې په سر ورک غم د نهار کړو
شین سپهر دغاباز باور پرې مه کړه
په دا کار مصلحت هسې چې تلوار کړو
د صبا په امید ډېر په ارمان لاړه
مونږ به ولې په صبا برات د کار کړو
زه او ته چې سره خوښ په مجلس کینو
د بد خواه په سر به کاڼي د ګهسار کړو
یاره زه او ته یو تن جدايي نشته
په حیات به تل خبرې د اسرار کړو
ولې نن د بهار ګل په ریاض راغله
تر همه چارو لازم چې یې دیدار کړو
په چمن د ګلزار څو رنګه چیغار کا
راشه یو ځل شنیده ژغ د هزار کړو
پس له کاله ګل میلمه شي په ریاض کې
لا به کله بیا دیدن د نور بهار کړو
په موسم د بهار نور شغل حرام دی
زه هجري او یار به سیر د بهار کړو