اشرف خان هجري
نن په مخ د زمکې زه لوی ګنهګار یم
همېشه تر خپلو بدو شرمسار یم
د نېکۍ عمل مې نشته شرمنده یم
په دوه داره دې له فضله طمعدار یم
زه خطا کوم همېش ته نیکويي کړې
باري شکر چې په خپل جرم اقرار یم
ستا کرم به البت ښه راسره وکا
زه که هر څو په عالم کې بدکردار یم
دا بهشت مې خپل وطن را یې عطا کړه
طمعدار دې زه له فضله د دیدار یم
د بهشت نعمت مې خپل که یې مولا کا
چې خادم د پاک نبي غوندې سالار یم
قضا کېښوم امانت په دا قفس کې
زه طایر د لا مکان د مرغزار یم
دا خاکي قفس زما بندیخانه شه
ګڼه زه د فرښتو سره په شمار یم
منتظر یې د فرمان کاندي بحرمه
نن میلمه د زحمتونو په دیار یم
نیکان ډاډ په ښه عمل لري یا ربه!
زه مجرم د خطاکارو په قطار یم
له عطا دې ډیر امید لرم غفوره!
زه هجري ځکه دایم په استغفار یم