اشرف خان هجري
همېشه د یار په مخ پسې رنځور یم
د هجران په اور یې تود لکه تنور یم
تش صورت مې تقدیر بند که په دکن کې
تل د زړه په یادو یار و ته حضور یم
زه په هومره ژبه ژاړم له هجرانه
چې امام د نای و چنګ و د تنبور یم
عشق هزار خفته بلا کړې راخبرې
صد رحمت مې په همت چې لا مسرور یم
زخمي زړه لره مرهم د وصال بویه
جدایۍ غوڅ کړی پروت په بیجاپور یم
د وصال په امید هر ساعت تازه شم
که هر څو له یاره لرې په ضرور یم
نیک و بد مې د تهمت په کاڼو ولي
زه هجري د اوسني دور منصور یم