هغه يار چې بې وفا دی څه يار نه دی

هغه کار چې بې بقا دی څه کار نه دی

که د سر ښيندل دشوار په ما و تا دي

دا په عشق کې سهل کار دی دشوار نه دی

انديښنه سړی بيدار کاندي له خوابه

کم انديشه که بيدار دی بيدار نه دی

که څه عمر دی عاشق لره وصال دی

د هجران عمر د عمر په شمار نه دی

د چشمانو په ځنبل کې تير و بير شي

اعتبار د زمانې اعتبار نه دی

که د سلو زويو پلار شي به يې څه کا

بې وقوفه زوی د پلار څه په کار نه دی

معشوقې هميشه ناز په عاشق کاندي

رحمان هيڅ له خپله ياره ازار نه دی