اشرف خان هجري
نه به ستا په مخ قایم وي دا جمال تل
نه به مینه زما وي په دا کمال تل
هر دولت چې زمانې چا ته عطا کړ
روزي نشو د هیچا هغه اقبال تل
د ګردون له نیرنګۍ بې غمه مه شه
په چا کله یک همان وي ماه و سال تل
نه به عشق زما دایم زمانه پریږدي
نه به ستا په مخ جلوه کا زلف و خال تل
بلبل ځکه تل په خار د هجر خوږ وي
چې موجود نه وي هرګز د ګل وصال تل
زمانه به دې د جور جواب درکا
څو به سترګې ستا کوي له ما قتال تل
د عشق راز به دې ظاهر په حیات نه کړم
دانا نه وایي و چا ته د زړه حال تل
اوس به دا غزل تمام په دا دعا کړم
هر دولت اګر چه نه وي لا زوال تل
د بڼو ترکښ دې تل په سترګو جوړ وه
چې سینه مې دې په غشو وي غربال تل
د هجري زړه دې همېش پکې محبوس وي
خو په مخ دې وي باقي د زلفو جال تل