اشرف خان هجري
نه په باغ کې وي موجونه د ګلزار تل
نه د راغ په مخ باقی وي ګل بهار تل
نه تور چتر په جبین وي تل د جونو
نه یې مار و ته مارونه وي تیار تل
نه یې مخ په مد د وروځو تل زینت کا
نه د حسن بازار جوړ وي په عذار تل
نه زمان د ښادۍ تل په چا قایم وي
نه دولت لري په چا باندې قرار تل
نه دایم د شباب وار چا ته موجود وي
نه د چا شونډې په شونډو وي د یار تل
غنیمت ګڼه دا وار په عیش مټ کړه
فلک نه پیرزو کوي د عیش وار تل
څو دا شنه څرخه په زمکه دور کاندي
په ارزو یې هیڅوک نه کړه برخوردار تل
په بقا د حسن دومره دماغ مه کړه
د ښایست په سمند څوک نه وي سوار تل
تل به ستا په مخ ښایست کله ډېره وي
چې به وي زما په زړه د عشق فګار تل
له ښادۍ سره غم هسې جوړه ګرځي
لکه ګل سره چې مل وي تیره خار تل
نه به تل هجري د عشق له غمه ژاړي
نه به یار په ملک د زیب وي شهریار تل