هغه دم چې هویدا که کردګار عشق

په نصیب یې که زما ستا د عذار عشق

که باران د تورو اوري باور مه کړه

چې له دله مې خروج وکا د یار عشق

لکه زه چې ستا د مخ په زیب مئین شوم

بلبل هم لري په زړه کې د ګلزار عشق

بلبل ګوره سر قربان کا یا یې نه کا

زما سر څو په منت که تر تا ځار عشق

دریغه ګل هم سر طلب کړي له بلبله

خود به خلقو ته ظاهر شي د هزار عشق

ایمان نه راوړم په کفر ستا د زلفو

چې یې تاز زما په غاړه که زنار عشق

ما چې ستا د مخ بهار مشاهده کړ

هغه دم مې زړه رخصت کړ د بهار عشق

لیده نشي هسې زړه په زمانه کې

چې زخمي نه که په سر ستا د رفتار عشق

یا ما زده او یا هغه چې راخبر دی

څو لرمه په خاطر ستا د ګفتار عشق

که بستر یې همه صوف وي خوب یې نشي

چې یې بل د دل په سر کا دو دونار عشق

هجري هله د جهان رونق پیدا شه

چې یې ګرم که قضا په دا بازر عشق